FASNACHTSWOCHE GESTARTET | 16.02.2012
Bereits hemmer super gstartet adr Atrinketä z'Sarne, wo wie all Jahr d'Rätschbäse wieder es chlises, aber geils Eröffnigsfäschtli uf d'Bei gstellt hend. Nachem feine Schoggichueche (danke Corina) hemmer scho glii als erschti Gugge üse Uftritt gha. Niwerdings gaht oi keis Susi meh verlore, da die jetz sogar im Dunklä sichtbar sind. Cheibe gäbig. Am Schmudo isch die bekannti Beizetour z'Giswil, womer vom Morge bis am Abig überall chli azträffe sind. Am Namitag gits de no de Chinderumzug und aschliessend wieder Chueche etc. im Mehrzwäckgebäude.

KNASTPARTY DOPPLESCHWAND / SEEGUSLER ALPNACH | 10./11.02.2012
Gärä wieder einisch uf Doppleschwand anes chlises, aber richtig geils Fäscht. Da hemmer sogar nu wellä midem Carchauffeur uishandle, obmer nid e Stund später chönnd abfahre. Leider isch das nid gange, drum isch de nur d'Hälfti heigfahre. Die andere hend sich de irgendwo irgendwie chönne zuecheschliiche. Am Samstig hemmer wie vor enere Wuche numal en cheibe Chälti aatroffä am Seegusler z'Alpnach, trotzdem hemmer üs döffe drü mal profiliere uf dr Bühni, was jewiils oi wieder mit viel Zueschauer (trotz dr Chälti) eifach meh Spass macht als ufere lääre Bühni. Vom Ärdbebe hend zwar die meischte öppe nüd gmerkt, aber bi dere geile Party isch me ja schliesslich anderwiitig beschäftiged gsi.

DÉJA-VU - 35 JAHRE BIRGERFÄGER | 04.02.2012
Nach üsem eigne Jubiläums-Fäscht hemmer bereits ei Wuche später chennä am Jubiläum vo de Birgerfäger go spilä. Trotz dr ungliebte Arschchälti hemmer bim Izug und au später uf dr Ussäbühni souverän üsi Musig präsentiert, leider mit chli wenig Zuehörer (was ja wie gseit bi dere Chälti keis Wunder isch) als susch öppe üblich. Dank em früehe Uftritt hemmer de nacher chönne de Abig so richtig aagah mit allem was das Fäscht so z'biete gha hed. Afänglich hed d'Konsumationscharte no grad für Unmuet gsorgt (mues me wieder zweimal aastah), aber wie sich de usegstellt hed isch susch am Fäscht au mit Bargeld zahle de doch gange. Viel Abwächslig näbst dr Turnhalle hend au die chline, chli versteckte Bars bote, wenn au dr Barwage meistens eher läär gsi isch. Alles i allem aber en super Abig gsi.

SCHÜTTLER-JUBIPARTY | 28.01.2012
Leider scho verbi, üsi super Jubiläumsparty. Aber mier hend einiges chönne uf d'Bei stelle, ha sälber mengisch gstuined was sich alles entwickled hed. Und gemäss all dene Reaktione wonich so ghört han vo allne Siite isch üses Fäscht dämentsprächend super aacho. Die gwissnigä hend sälbst am Morge am 6i noni rächt hei wellä, die hemmer de aber doch nu chennä zum Zmorgä oder heigah uberredä ;) Alles i allem es absolut glungnigs Fäscht mit allem drum und dra. A dere Stell im Name vo allne Schüttler nomal es riiiiiesig grosses Dankeschön a alli Hälfer für üche unermüedliche Arbeits-Isatz, a allne Sponsore und Gönner für üchi Understützig, a alli Awohner für üches Verständnis und natürlich a alli Bsuecher womer gha hend fürs verbi luege, ässe und trinkä. MIER HEND FREID!