SCHÜTTLERPARTY-NEWS:

26.01.2012: Ordäli vorwärts cho simmer (soviel ich weiss). Ussäbühni, Zältbühni, Hallebar, Chelibuidä, Barwagä, sälbscht d'WC wärid scho parat. Aso gsehd scho huere geil uis!

25.01.2012: D'Bar im Guggäzält wär scho fasch parat, jedäfalls zum alähne. Kassähuisli äbefalls scho montiert, aso mä gsehd scho langsam, was da alles entstaht.

24.01.2012: Trotz Schneefall isch natürlich wieder gschaffed worde. Dr Päddy und Fredy hend sich ämu nid la uifhaltä vo dene paar Flöckli. Und was wär ä Schüttlerparty ohni ordäli Winterdeko?

21.01.2012: Bereits hemmer agfange uifstelle für üse grosse Alass. Näbscht viel Deko hemmer scho s'grosse Zält ufem Sportplatz chönne stelle und diversi chliineri Sache vorab erledigt. Ab em nächste Mittwuch simmer de täglich dra nach und nach alles anderi au nu ufzstelle, so dass ier bi üs es unvergässlichs Fäscht chönnd erläbe.

FASNACHTSGOTTESDIENST / ORIENTIERIGSHOCK | 22.01.2012
Inzwüschä zur Tradition worde isch dr alljährlichi Fasnachtsgottesdienst idr Chilä Rudänz. All Jahr chemid wieder äs paar Zueschauer meh, was üs natürlich umso meh freut und mier wiederum mit üserer Muisig als Dankeschön zrugg gäbid. Am Abig hemmer de idr Chronä Giswil no de awesendä Wagäbuiär, Umzugsvideolueger, dr übrige Gäscht und em Fakogi äs Ständli bracht. Nachdem am geschtrige Tag viel für d'Schüttlerparty gmacht worde isch, simmer froh gsi hemmer nid so strengi Uiftritt gha. Nächst Samstig aso nid vrpassä!

FASNACHTSERÖFFNUNG KERNS | 14.01.2012
Als Gaschtgugge vom Dani I. hemmer de z'Chärns grad 4 Uiftritt deffä anäleggä. Zersch bim Iizug und uf dr Stäge bim Pfarrhof, wo die Fasnachtseröffnig offiziell gmacht worde isch, denn natürlich am traditionelle Fackelumzug, de uf dr Kreisel-Bühni und zu guter Letzt no idr Chronä innä. Alles i allem en super Abig bzw. Nacht gsi mit beschter Stimmig, gueter Musig und was me susch vonere guete Fasnachtsparty erwartet. Nächst Weekend hemmer de wäg üserer Schüttlerparty fürs Uifstelle etc. verplaned, tüend aber traditionell wie jedes Jahr glich am Fasnachtsgottesdienst idr Chilä Rudänz teilnäh.

FASNACHTSERÖFFNUNG GISWIL / ALPNACH / SARNEN | 06.-07.01.2012
Am erschte Fasnachtsweekend im neue Jahr hemmer grad volls Programm gha mit 3 Fasnachtseröffnige im Kanton. Am Fritig traditionells Heimspiel in Giswil, de am Samstig Namitag uf Alpnach und am Abig nu uf Sarne. Au wenns chli streng worde isch hemmer de ufem Dorfplatz z'Sarne numal alles gäh zum üses Publikum z'underhalte. Da mier wieder mal Glück midem Wätter gha hend simmer in Alpnach wie au in Sarne vo Räge und iisige Temperature ziemlich verschont worde, trotzdem es ja eigentlich Winter wär. Wemmer nächst Samstig wieder sones Wätter hend in Chärns chan ja eigentlich nüd schief gah am folgende Weekend.